Amjad Islam Amjad Poetry in Urdu

اَب تک نہ کُھل سکا کہ ، میرے رُوبَرُو ھے کون

کِس سے مَکالَمَہ ھے ، پسِ گُفتگُو ھے کون
سایہ اگر ھے وہ ، تو ھے اُس کا بَدن کہاں ؟؟
مرکز اگر ھُوں میں ، تو میرے چار سُو ھے کون ؟؟
ہر شے کی ماھیَّت پہ ، جو کرتا ھے تُو سوال
تُجھ سے اگر یہ پوچھ لے کوئی ، کہ تُو ھے کون ؟؟
اَشکوں میں جِھلمِلاتا ھُوا ، کس کا عَکس ھے ؟؟
تاروں کی رَھگُزر میں ، یہ ماہ رَو ھے کون ؟؟
باھر کبھی تو جھانک کے ، کھڑکی سے دیکھتے
کس کو پکارتا ھُوا ، یہ کُو بہ کُو ھے کون ؟؟
آنکھوں میں رات آ گئی ، لیکن نہیں کُھلا
میں کِس کا مدّعا ھُوں؟ میری جُستُجُو ھے کون ؟؟
کِس کی نگاہِ لُطف نے ، موسم بدل دیے ؟؟
فصلِ خزاں کی راہ میں ، یہ مُشکبُو ھے کون ؟؟
بادَل کی اوٹ سے ، کبھی تاروں کی آڑ سے
چُھپ چُھپ کے دیکھتا ھُوا ، یہ حیلہ جُو ھے کون ؟؟
تارے ھیں آسماں میں ، جیسے زمیں پہ لوگ
ھر چند ایک سے ھیں ، مگر ھُو بہ ھُو ھے کون ؟؟
ھونا تو چاھیے ، کہ یہ میرا ھی عَکس ھو
لیکِن یہ آئینے میں ، میرے رُوبَرُو ھے کون ؟؟
اس بے کنار ، پھیلی ھُوئی کائنات میں
کِس کو خبر ھے کون ھُوں میں ، اور تُو ھے کون
سارا فَساد بڑھتی ھُوئی ، خواھشوں کا ھے
دِل سے بڑا جہان میں ، امجدؔ عدُو ھے کون ؟
امجد اسلام امجد
_____________________

اگر یہ کہہ دو

اگر یہ کہہ دو
بغیر میرے نہیں گزارا ،
تو میں تمہارا…

یا اس پہ مبنی
کوئی تاثر کوئی اشارہ ،
تو میں تمہارا…

غرور پرور ، انا کا مالک
کچھ اس طرح کے ہیں نام میرے ،

مگر قسم سے
جو تم نے اک نام بھی پکارا ،
تو میں تمہارا…

تم اپنی شرطوں پہ کھیل کھیلو ،
میں جیسے چاہوں لگاؤں بازی ،

اگر میں جیتا تو تم ہو میرے ،
اگر میں ہارا ،
تو میں تمہارا…

تمہارا عاشق ، تمہارا مخلص
تمہارا ساتھی ، تمہارا اپنا

رہا نہ ان میں سے کوئی دنیا میں ،
جب تمہارا ،
تو میں تمہارا…

تمہارا ہونے کے فیصلے کو ،
میں اپنی قسمت پہ چھوڑتا ہوں ،

اگر مقدر کا کوئی ٹوٹا ،
کبھی ستارہ ،
تو میں تمہارا…

یہ کس پہ تم تعویز کر رہے ہو ؟
یہ کس کو پانے کے ہیں وظیفے ؟

تمام چھوڑو بس ایک کر لو ،
جو استخارہ ،
تو میں تمہارا

Leave a Comment